કોવિડ પછી આ દેશમાં ફેલાયો નવો રોગ, કડક લોકડાઉન લાગુ

ઉત્તર કોરિયાની રાજધાની પ્યોંગયાંગમાં શ્વાસ સંબંધી રોગોના વધતા જતા કેસ સામે આવી રહ્યા છે. આ અંગે અધિકારીઓએ પ્યોંગયાંગમાં 5 દિવસના કડક લોકડાઉનની જાહેરાત કરી છે. આ દરમિયાન તમામ નાગરિકોને ઘરની બહાર નીકળવા પર પ્રતિબંધ મુકવામાં આવ્યો છે. આ સાથે રાજધાનીમાં હાજર વિદેશી દૂતાવાસોને પણ સરકારના આદેશનું પાલન કરવાની સૂચના આપવામાં આવી છે.

લોકડાઉન અંગે જાહેર કરાયેલી સરકારી નોટિસમાં કોવિડ-19નો કોઈ ઉલ્લેખ નથી. તેમાં કહેવામાં આવ્યું છે કે શહેરના રહેવાસીઓએ રવિવારના અંત સુધી તેમના ઘરોમાં રહેવું જરૂરી છે. આ સાથે લોકોએ દરરોજ તેમના શરીરના તાપમાન વિશે માહિતી આપવી પડશે. સ્થાનિક સમાચાર એજન્સીના અહેવાલ મુજબ પ્યોંગયાંગમાં શ્વાસ સંબંધી અજાણ્યા રોગના કેસ ઝડપથી વધી રહ્યા છે. આ પછી શહેરમાં લોકડાઉન લાગુ કરવામાં આવ્યું છે.

સ્થાનિક વેબસાઇટે મંગળવારે અહેવાલ આપ્યો છે કે પ્યોંગયાંગના લોકોને કડક લોકડાઉનનો ડર છે. જેના કારણે લોકો માલનો સ્ટોક કરતા જોવા મળ્યા હતા.ઉત્તર કોરિયાના અન્ય વિસ્તારોમાં લોકડાઉન લાદવામાં આવ્યું છે કે કેમ તે હજુ સુધી જાણી શકાયું નથી.ઉત્તર કોરિયાએ ગયા વર્ષે તેના પ્રથમ કોરોનાની પુષ્ટિ કરી હતી, પરંતુ ઓગસ્ટ સુધીમાં જાહેરાત કરવામાં આવી હતી કે તેમણે વાયરસ પર જીત મેળવી લીધી છે. જો કે આ દેશે ક્યારેય પુષ્ટિ કરી નથી કે અત્યાર સુધીમાં કેટલા લોકો કોરોનાને કારણે મૃત્યુ પામ્યા છે.

નોંધપાત્ર વાત એ છે કે ઉત્તર કોરિયાએ ક્યારેય જણાવ્યું નથી કે દેશમાં કેટલા લોકો કોરોના વાયરસથી સંક્રમિત છે. ઉત્તર કોરિયામાં પણ કોરોના ટેસ્ટિંગ મશીનોનો અભાવ હતો. પ્યોંગયાંગમાં ક્યારેય કોરોનાના પોઝિટિવ કેસ નોંધાયા નથી. 29 જુલાઈ પછી આવી કોઈ માહિતી આપવામાં આવી નથી.