ગોપાલ ઈટાલીયાએ કહ્યું, ગૃહમંત્રી સુધી ડ્રગ્સના હપ્તા નથી પહોંચતા, તો બેઠક કરો

આમ આદમી પાર્ટી (AAP) દ્વારા બનાસકાંઠા જિલ્લાના પાલનપુર તાલુકાના ચડોતર ગામે કિસાન મહાપંચાયતનું આયોજન કરવામાં આવ્યું હતું. “ખેડૂતો અને ખેતમજૂરોને ન્યાય અપાવો” એવા સ્લોગન સાથે યોજાયેલી આ મહાપંચાયતને AAPના પ્રદેશ નેતા ઈસુદાન ગઢવી, ગોપાલ ઈટાલિયા, ચૈતર વસાવા સહિતના અગ્રણીઓએ સંબોધિત કરી હતી.

બનાસકાંઠા જિલ્લાની વિવિધ જગ્યાઓથી મોટી સંખ્યામાં કાર્યકરો અને સ્થાનિક લોકો આ મહાપંચાયતમાં જોડાયા હતા. સ્ટેજ પરથી ઈસુદાન ગઢવી, ગોપાલ ઈટાલિયા અને ચૈતર વસાવાએ રાજ્યની ભાજપ સરકાર પર ખેડૂતોના મુદ્દા અને ડ્રગ્સના પ્રશ્ને તીખી ટીકા કરી હતી.

ગોપાલ ઈટાલિયાએ કહ્યું કે ડ્રગ્સની સમસ્યા કોઈ એક પાર્ટી કે જ્ઞાતિની નથી, તે સમગ્ર સમાજની સામૂહિક સમસ્યા છે. જો ગૃહમંત્રી ખરેખર આ મુદ્દે ગંભીર હોય અને તેમના સુધી ડ્રગ્સના હપ્તા ન પહોંચતા હોય, તો તેમને સર્વપક્ષીય મિટિંગ બોલાવવી જોઈએ.

પોલીસના “પટ્ટા ઉતારવાના” વિવાદ પર પણ ઇટાલિયાએ તીખી ટિપ્પણી કરી. તેમણે કહ્યું:
“પોલીસને પટ્ટો કમર પર પહેરવા માટે આપવામાં આવ્યો છે. જ્યાં સુધી પટ્ટો કમર પર છે ત્યાં સુધી તેની ઇજ્જત છે. પરંતુ જો કોઈ પટ્ટો ગળામાં પહેરીને ટોમી બની જાય, તો શું કરવું? કમરનો પટ્ટો કમરપર જ સોભે છે — અને જેને કમર પર પહેર્યો છે, તેને બે હાથથી સલામ. પણ ભાજપના ઇશારાએ ગળામાં પટ્ટો પહેરવાની ફરજ પડી હોય, તો આવા પટ્ટા ઉતરવા જ જોઈએ — એમાં ખોટું શું?”

જીગ્નેશ મેવાણીના નિવેદનને લઈને તેમણે પોતાનો પોલીસનો અનુભવ પણ શેર કર્યો:
“હું પોતે કોન્સ્ટેબલ રહ્યો છું. શર્ટ શરીર પર પહેરવાનો છે—ઘૂંટણ પર પહેરીશ તો કેવાં લાગું? પેન્ટ ગળામાં પહેરું તો છપરી લાગીશ. એ જ રીતે પટ્ટો કમર પર જ સોભે. ગળામાં પહેરે તો પોલીસ નહીં, પણ ટોમી બની જાય. તેથી આવા લોકોના પટ્ટા ઉતરવા જોઈલે — આમાં કોઈ ખોટ નથી.”