દાહોદ શહેરમાં આમ આદમી પાર્ટીના નેતા દેવેન્દ્ર મેડા સામે મહિલા દ્વારા અપહરણ અને શારીરિક અડપલાં કરવાની ગંભીર ફરિયાદ નોંધાતા રાજકીય વર્તુળોમાં હલચલ મચી ગઈ છે. ફરિયાદ મુજબ, નોકરી અપાવવાના બહાને મહિલાને કારમાં બેસાડી દેવેન્દ્ર મેડાએ અપહરણ કર્યું હતું. આ દરમિયાન કારની અંદર શારીરિક અડપલાં કરવાનો પણ આક્ષેપ છે. ઘટનાની જાણ થતાં જ દાહોદ બી ડિવિઝન પોલીસે મેડાને ઝડપીને તપાસ શરૂ કરી છે.
દેવેન્દ્ર મેડા થોડા દિવસ પહેલાં જ BTP ગુજરાત પ્રદેશ પ્રમુખ પદેથી રાજીનામું આપી, દિલ્હીના પૂર્વ CM અરવિંદ કેજરીવાલની હાજરીમાં આમ આદમી પાર્ટીમાં જોડાયા હતા. નવા રાજકીય પ્રવાસની શરૂઆત બાદ જ તેમના નામે આવી ગંભીર ફરિયાદ નોંધાતા સમગ્ર વિસ્તારમાં ચર્ચાનો માહોલ ગરમાયો છે.
પોલીસ સૂત્રો મુજબ, મેડાના વિરુદ્ધ અગાઉ પણ હથિયાર ધારાનો સહિત અનેક કેસ નોંધાયેલા છે. નવા કેસ ઉમેરાતા રાજકીય સ્તરે તેમની વિરુદ્ધ પ્રતિક્રિયાઓ વધુ તીવ્ર बनी છે. સ્થાનિક સ્તરે પક્ષના સમર્થકો અને વિરોધીઓ વચ્ચે ચર્ચા અને ટીકા-ટિપ્પણીઓ ઉગ્ર બનેલી છે.
હાલ દાહોદ બી ડિવિઝન પોલીસ સમગ્ર પ્રકરણની વિગતવાર તપાસ કરી રહી છે. પીડિતા મહિલાનો નિવેદન, સ્થળ-પુરાવા અને ફરિયાદમાં ઉલ્લેખિત તમામ મુદ્દાઓને આધારે આગળની કાર્યવાહી ચાલી રહી છે. આ ગંભીર આરોપોમાં તપાસની દિશા અને અંતિમ પરિણામો પર સૌની નજર ટકેલી છે.
