સોફ્ટવેર ડેવલોપર જીલ ઠકકર સુરતમાં સ્પીચ આપતાં આપતાં ઢળી પડી અને મોત

સુરત શહેરમાં છેલ્લા કેટલાક સમયથી અચાનક બેભાન થઈ જવાથી થતા મોતના કિસ્સાઓ સતત વધી રહ્યા છે. રોજે રોજ એક કે બે લોકોના અચાનક બેભાન થયા બાદ મૃત્યુના બનાવો સામે આવી રહ્યા છે. આ વચ્ચે વધુ એક હૃદયદ્રાવક ઘટના કાપોદ્રા વિસ્તારમાં બની છે, જ્યાં ધારુકાવાળા કોલેજમાં મંચ પર ભાષણ આપતી વખતે એક યુવતી અચાનક બેભાન થઈ પડી અને ત્યારબાદ તેનું મોત નીપજ્યું.

પોલીસ પાસેથી મળતી માહિતી અનુસાર, મૃતક 24 વર્ષની જીલબેન સુરેશભાઈ ઠક્કર, અમદાવાદના રાયપુર સ્થિત અકાશેઠની પોળ વિસ્તારમાં રહેતી હતી. જીલબેન ખાનગી આઈટી કંપનીમાં સોફ્ટવેર ડેવલપર તરીકે કાર્યરત હતી. ગઈકાલે વહેલી સવારે તે પોતાના મિત્રો સાથે સુરતના કાપોદ્રા વિસ્તારમાં આવેલી ધારુકાવાળા કોલેજમાં વર્લ્ડ કેમ્પ માટે આવી હતી.

કેમ્પ દરમિયાન કોલેજના ઓડિટોરિયમમાં ભાષણ આપતી વખતે જીલબેન અચાનક મંચ પર જ પડી ગઈ અને બેભાન થઈ ગઈ. તરત જ તેને નજીકની ખાનગી હોસ્પિટલમાં ખસેડવામાં આવી, પરંતુ તબીબોએ તપાસ બાદ તેને મૃત જાહેર કરી.

કાપોદ્રા પોલીસે જણાવ્યું છે કે, જીલબેન જે કંપનીમાં કામ કરતી હતી તે કંપનીનું કેમ્પ ધારુકાવાળા કોલેજમાં આયોજિત હતું. ઘટનાસ્થળેથી મળેલી માહિતીના આધારે પ્રાથમિક અંદાજ મુજબ યુવતીને હાર્ટ એટેક આવ્યો હોવાનું જણાય છે. મૃતદેહનું પોસ્ટમોર્ટમ કરવામાં આવ્યું છે અને મોતનું ચોક્કસ કારણ જાણવા માટે નમૂનાઓ લઈ તપાસ હાથ ધરાઈ છે.

પોલીસ સૂત્રો મુજબ, મૃતકનો એક મોટો ભાઈ છે અને આખા પરિવાર પર આ ઘટનાથી શોકની છાયા છવાઈ ગઈ છે.

ગત કેટલાક મહિનાઓથી સુરત સહિત ગુજરાતભરમાં અચાનક બેભાન થઈ જવાથી થતા મોતના કિસ્સાઓમાં સતત વધારો જોવા મળી રહ્યો છે. દરેક કેસમાં પોસ્ટમોર્ટમ અને ફોરેન્સિક તપાસ કરવામાં આવી રહી છે, અને મોટાભાગના બનાવોમાં હાર્ટ અટેક અથવા અચાનક કાર્ડિયાક ફેલ્યર કારણ તરીકે સામે આવી રહ્યું છે.