ચોરે ઉર્વશી રૌતેલાને ઈ-મેલ મોકલ્યો, ફોન પાછો આપવા માટે આવી શરત મૂકી

બોલિવૂડની અભિનેત્રી ઉર્વશી રૌતેલાનો ક્રિકેટ પ્રત્યેનો પ્રેમ હંમેશા દેખાઈ રહ્યો છે. તાજેતરમાં ઉર્વશીએ ફરી એકવાર લોકોને ક્રિકેટ પ્રત્યેનો પોતાનો જુસ્સો બતાવ્યો જ્યારે તે અમદાવાદના નરેન્દ્ર મોદી સ્ટેડિયમમાં ભારત-પાકિસ્તાનની મેચ જોવા આવી હતી. આ દરમિયાન તેણે ભારતને જોરશોરથી ચીયર કર્યું હતું. જો કે, ઉર્વશી મેચ જોવામાં એટલી મગ્ન હતી કે તેનો 24 કેરેટ સોનાનો આઈફોન સ્ટેડિયમમાં ખોવાઈ ગયો. ઉર્વશીએ આ માહિતી આપી હતી.

ટ્વિટર પર પોસ્ટ શેર કરતી વખતે ઉર્વશી રૌતેલાએ લખ્યું – ‘નરેન્દ્ર મોદી સ્ટેડિયમમાં મારો 24 કેરેટનો આઇફોન ખોવાઈ ગયો છે. કૃપા કરીને જો કોઈને તે મળે, તો તરત જ સંપર્ક કરો. આ સાથે અભિનેત્રીએ અમદાવાદ પોલીસને પણ ટેગ કર્યું હતું. આ પછી અભિનેત્રીએ તાજેતરમાં એક નવી જાહેરાત કરી હતી. જેમાં તેણે કહ્યું હતું કે તેનો ફોન શોધનારને ગિફ્ટ આપવામાં આવશે. અભિનેત્રી ઉર્વશી રૌતેલાએ પોતાના ઈન્સ્ટાગ્રામ એકાઉન્ટ પર પોસ્ટ શેર કરતા લખ્યું કે, ‘તેના ફોનનું લોકેશન ટ્રેક કરવામાં આવ્યું છે. તેનું લોકેશન અમદાવાદના એક મોલમાં જોઈ શકાય છે.

આ પછી અભિનેત્રીએ પોસ્ટમાં કહ્યું હતું કે જેઓ તેનો ફોન શોધી કાઢશે તેને ઈનામ આપવામાં આવશે.જો કે આ ઈનામમાં શું સામેલ હશે તે હજુ જાહેર કરવામાં આવ્યું નથી. પરંતુ આ દરમિયાન ઉર્વશી રૌતેલાને એક મેલ મળ્યો છે જે ફોન ચોર દ્વારા મોકલવામાં આવ્યો છે.ઈ-મેલમાં ફોન ચોરે જણાવ્યું છે કે તેણે ઉર્વશી રૌતેલાનો ફોન ચોરી લીધો છે. ઉર્વશી રૌતેલા તેના ભાઈની કેન્સરની સારવાર કરાવશે ત્યારે જ તે તેને ફોન પરત કરશે.

ઉર્વશી રૌતેલાને આ મેલ Groww Tradersના નામે મળ્યો છે, જેનો સ્ક્રીનશોટ અભિનેત્રીએ તેના સોશિયલ મીડિયા પર શેર કર્યો છે. આ પોસ્ટ શેર કરતી વખતે, અભિનેત્રીએ એક થમ્બ્સ અપ ઇમોજી પણ બનાવ્યું છે, જેને જોઈને અનુમાન લગાવી શકાય છે કે અભિનેત્રી તેનો ફોન મેળવવા માટે તે વ્યક્તિને મદદ કરવા તૈયાર છે.