16,000 થી વધુ હાર્ટ સર્જરી કરનારા જામનગરના ડૉક્ટરનું હાર્ટ એટેકથી મૃત્યુ થયું
કહેવાય છે કે જીવનની કોઈ ખાતરી નથી, મૃત્યુ ગમે ત્યારે આવી શકે છે. અને છેલ્લા કેટલાક સમયથી આવી અનેક ઘટનાઓ સામે આવી છે, જેમાં ક્રિકેટ રમતી વખતે, ક્યારેક લગ્નમાં ડાન્સ કરતી વખતે, ક્યારેક જિમ કરતી વખતે અથવા વૉકિંગ કરતી વખતે અને ક્યારેક ઓફિસમાં બેસીને ઘણા લોકોના મોત થયા છે. અને મૃત્યુ પામેલા આ લોકો તમામ ઉંમરના છે. તાજેતરમાં જ આવી ઘટના પણ સામે આવી છે જેમાં હૃદયરોગના નિષ્ણાત તબીબનું હાર્ટ એટેકના કારણે મોત થયું છે.
આ દુઃખદ ઘટનામાં જામનગર એસ.ટી. સ્ટેન્ડ સામે આવેલી શારદા હોસ્પિટલમાં ફરજ બજાવતા ડો.ગૌરવ ગાંધી ગત રાત્રિ સુધી તેમના નિત્યક્રમ મુજબ દર્દીઓની સારવારમાં વ્યસ્ત હતા. જે બાદ તે રાત્રે પેલેસ રોડ પર આવેલા સામરાજ્ય એપાર્ટમેન્ટના ત્રીજા માળે પોતાના ઘરે પહોંચ્યા હતા અને જમ્યા બાદ રોજની જેમ સૂઈ ગયા હતા. સવારે 6 વાગ્યે તે બેભાન અવસ્થામાં મળી આવ્યા હતા, જેના કારણે તેમને 108 દ્વારા જીજી હોસ્પિટલ લઈ જવામાં આવ્યા. જ્યાં હૃદયરોગના નિષ્ણાંત તબીબોએ બે કલાક સુધી તેમની સારવાર કરી હતી, પરંતુ ડો.ગૌરવ ગાંધીને બચાવી શકાયા ન હતા અને અંતે તેમને મૃત જાહેર કરાયા હતા.
1982માં જન્મેલા 41 વર્ષીય ડૉ.ગૌરવ ગાંધી તેમના કામમાં ખૂબ જ નિષ્ણાત હતા અને તેમની કારકિર્દી દરમિયાન તેમણે 16,000થી વધુ એન્જિયોગ્રાફી અને એન્જિયોપ્લાસ્ટી સર્જરી કરી છે. તેઓ પોતાની પાછળ પિતા દિનેશચંદ્ર ગાંધી, માતા કુસુમબહેન, પત્ની ડૉ. દેવાંશી ગાંધી અને પુત્રી ધનવી અને પુત્ર પ્રખરને વિલાપ કરતા છોડી ગયા. જો કે ડૉ.ગૌરવ ગાંધીનું મૃત્યુ કાર્ડિયાક અરેસ્ટને કારણે થયું હતું, છતાં સ્પષ્ટ કારણ જાણવા માટે જી.જી. હોસ્પિટલમાં પોસ્ટમોર્ટમ કરવામાં આવ્યું હતું, જેથી કાર્ડિયાક અરેસ્ટ અંગે વધુ સ્પષ્ટ માહિતી મેળવી શકાય.
એક ડોક્ટરના જણાવ્યા અનુસાર, કોરોના પછી ગયા વર્ષથી હાર્ટ એટેકના કેસમાં વધારો થયો છે. 35 થી 45 વર્ષના લોકોને હાર્ટ એટેક આવે છે. નેશનલ IMAએ પણ આ મામલે ચિંતા વ્યક્ત કરી છે. કારણ કે તાજેતરમાં જ 14 વર્ષના બાળકનું ક્રિકેટ રમતા રમતા મોત થયું હતું. એ જ રીતે 3 માર્ચે તેમની કોલોનીમાં મોર્નિંગ વોક કરી રહેલા 57 વર્ષીય સ્કિન સ્પેશિયાલિસ્ટ ડૉ. સંજીવ ચગ પણ પડી જતાં તેમને તાત્કાલિક 108 એમ્બ્યુલન્સ દ્વારા જીજી હોસ્પિટલમાં લઈ જવામાં આવ્યા હતા, જ્યાં તેમને પમ્પિંગ સહિતની સારવાર આપવામાં આવી હતી. આ પછી ડૉક્ટરોએ તેમને મૃત જાહેર કર્યા હતા.