સુરતમાં ચાલુ ટ્રેક્ટરમાં પિતાના ખોળામાંથી પુત્રી નીચે પડી, ટ્રેક્ટરના પૈડા નીચે કચડાઈ ગઈ

સુરતના સરથાણા વિસ્તારમાં એક દર્દનાક અકસ્માતની ઘટના સામે આવી છે. ટ્રેક્ટર ચલાવી રહેલા પિતાના ખોળામાંથી કૂદી પડેલા માસૂમનું પૈડા નીચે આવી જતાં દર્દનાક મોત નીપજ્યું હતું. ઘટના સરથાણા વિસ્તારની છે. પ્રાપ્ત માહિતી અનુસાર ટ્રેક્ટરમાં અચાનક બ્રેક લાગવાને કારણે જોરદાર આંચકો આવ્યો હતો અને તેની પુત્રી ખોળામાંથી પડી હતી અને ટ્રેક્ટરના વ્હીલ નીચે કચડાઈ ગઈ હતી. તેનું ઘટનાસ્થળે જ મોત થયું હતું.

પોલીસ સુત્રો પાસેથી મળતી માહિતી મુજબ મૂળ મધ્યપ્રદેશનો વતની સુરેશ સુરમલ સિંગડીયા રોજગાર અર્થે સુરત આવ્યો હતો અને હાલ સરથાણા નેચર પાર્કની અંદર આવેલ એક રૂમમાં પરિવાર સાથે રહેતો હતો. તે ટ્રેક્ટર ચલાવતો હતો. સોમવારે સાંજે તેઓ તેમની 2 વર્ષની પુત્રી સાથે મજૂરી કરવા જતા હતા. માસૂમ તેના ખોળામાં હતી.

ટ્રેક્ટર નેચર પાર્કની સામેથી પસાર થયું હતું ત્યારે અચાનક તેને બ્રેક મારવી પડી. આ જોરદાર ફટકાથી બાળકી ખોળામાંથી નીચે પડી ગઈ અને પાછળના ટાયરમાં આવી ગઈ. ભારે ટાયર છાતી પરથી પસાર થતાં માસૂમનું ઘટનાસ્થળે જ મોત થયું હતું. સુરેશ બે પુત્રી અને પત્ની સાથે સુરતમાં રહેતો હતો. પોલીસે ગુનો નોંધી આગળની કાર્યવાહી હાથ ધરી છે.